Kreu i Grupit Parlamentar të PS-së, Taulant Balla i ka bërë thirrje parlamenteve të vendeve të Evropës Juglindore, të dëgjojnë partnerët amerikanë kur bëhet fjalë për rrjetin 5G.
Balla foli në lidhje me këtë çështje në takimin vjetor të përfaqësuesve të komisioneve të mbrojtjes dhe sigurisë, nga parlamentet e Evropës juglindore.
“Duhet të dëgjojmë partnerët tanë amerikanë kur bëhet fjalë për rrjetet 5G. Jo të gjitha kompanive që ndërtojnë këto rrjete mund tu besojmë të dhënat tona personale. Ndonjë prej tyre mund ti përdorë për qëllime të tjera. Duhet të forcojmë legjislacionin tonë për t’i pamundësuar këto kompani dhe të rrisim sigurinë e sistemeve tona informatike”, tha ai.
Balla shtoi se krimi kibernetik duhet trajtuar me seriozitetin e duhur, pasi sipas tij ai prek drejtpërdrejtë sovranitetin e një vendi.
“Për këtë qëllim për shkak se siguria e informacionit është thelbësore, duhet të punojmë më shumë për ndërgjegjësimin e përdoruesve të Internetit dhe rritjen e sigurisë në rrjetet shtetërore. Vetëm pak ditë më parë kam depozituar një Projekt-Rezolutë “Për ndërhyrjet e huaja në proceset elektorale dhe dezinformimin në proceset demokratike kombëtare”. Në këtë Projekt- Rezolutë konstatojmë që Shqipëria është e predispozuar ndaj sulmeve kibernetike dhe dezinformimin të cilat mund të ndikojnë në përbërjen e institucioneve të vendit dhe demokracinë tonë. Për këtë qëllim ndërmarrja e masave nga autoritetet përkatëse është e nevojshme për të siguruar që procesi demokratik, si dhe zgjedhjet, të mbrohen nga ndërhyrjet dhe manipulimet e aktorëve të huaj shtetërorë dhe jo-shtetërorë”, vijoi ai.
Kujtojmë që pak ditë më parë ishte kryeministri Edi Rama, i cili njoftoi shtrirjen edhe në Shqipëri të teknologjisë 5G.
