Çekia njoftoi të martën për 10.273 raste të reja me COVID-19. Ndodhur në kushtet kur pandemia ka mbërthyer vendin, janë rikthyer masat kufizuese. Qeveria e Çekisë vendosi izolimin nga ora 21:00 deri në 05:00, si masë për të parandaluar përhapjen e koronavirusit. Kjo masë do të jetë në fuqi deri në datën 3 nëntor.
Vlen të theksohet fakti se qeveria ka shtuar kufizimet tre herë në dy javët e fundit, për shkak të rritjes së numrit të të infektuarve.
Dyqanet me pakicë që ende funksionojnë nën kufizimet aktuale, duhet të mbyllen deri në orën 20:00. Të dielave gjithçka duhet të jetë e mbyllur, me përjashtim të pikave të karburantit, farmacive ose dyqaneve në stacionet e trenit dhe pikat e tjera të udhëtimit.
Në total, Republika Çeke ka regjistruar 268.370 raste të të infektuarve me koronavirus.
