Rritja e rasteve me Covid-19 në vend, ka detyruar Komitetin Tekntik të Ekspertëve që të marrë vendimin e parë për të kufizuar përhapjen e infeksionit.
Kryetarja e këtij komiteti, Mira Rakacolli, tha se gjatë mbledhjes është analizuar situata në vend, rajon dhe në Evropë.
Gjatë një deklarate për mediat, ajo tha se universitetet do të zhvillojnë mësimin online, për të paktën 1 muaj, dhe se konviktet do të jenë të mbyllura.
“Në mbledhjen e zhvilluar pak momente më parë Komitetin Teknik i Eksperteve, ka analizuar situatën dhe risqet, kemi vlerësuar situatën në rajon dhe Europe, masat e ndërmarra nga këto vende, zbatimin e masave në vendin tonë, ecurinë e epidemisë në vend dhe kemi vendosur unanimisht të propozojmë që universitetet të zhvillojnë vetëm mësim online, pra mësim vetëm ne distancë pa prezence fizike të paktën për muajin e parë të hapjes duke vlerësuar situatën ne dinamike. Aulat dhe konviktet do të jenë të mbyllura deri në një vendim të dytë”, tha Rakacolli.
Njëkohësisht,po vlerësohet mbyllja e bareve dhe lokalave në zonën e Bllokut në Tiranë mbas orës 22:00.
Rakacolli tha se nëse qytetarët nuk do të respektojnë masat, rrezikohet mbyllja e dytë.
“Komiteti po vlerëson mbylljen e bareve dhe kafeneve të ish-Bllokut pas orës 22:00 pasi konstatohet vatër rreziku i madh i mundshëm në atë zonë, sidomos gjatë orëve të natës. “Një thirrje për të gjithë, për të zbatuar rregullat e vendosura, nëse nuk ka disiplinë do të rrezikojme mbylljen që askush nuk e do. Secili prej nesh e ka në dorë të frenojë përhapjen e epidemisë. Vendimi që kemi marrë për maskën e detyrueshme është një vendim i drejtë, i provuar tashmë për dobinë e tij. Mbajeni maskën kudo dhe ruani distancimin fizik, pa harruar higjienën e duarve”, u shpreh Rakacolli.
