24 orët e fundit kanë shënuar një rritje të numrit të infektuarve me koronavirus. Instituti i Shëndetit Publik konfirmoi sot 18 raste të reja me COVID-19. Kjo shifër ka thyer “traditën” e dy ditëve të mëparshme. Lidhur me këtë situatë, mjeku i njohur Tritan Kalo kërkoi nga ana e qytetarëve që të mos nënvlerësojnë masat e distancimit fizik.
“Hapja dhe shtimi i kontaktit në popullatë, e bën të pritshme shtimin e rasteve. Nuk janë raste të vatrave të reja, por janë kontakte me të sëmurët e mëparshëm. Kjo e bën të nevojshme që të ruajmë distancën fizike. Pra, kjo hapja dhe kjo lëvizja bën që njerëzit t’i nënvlerësojnë masat e distancimit fizik, dhe kjo bën detyrimisht të shtohet numri. Kemi mbi 13 ditë që nuk kemi asnjë viktimë nga kjo sëmundje, dhe këto parametra po përpiqemi t’i ruajmë. Faktori kryesor është sjellja e qytetarëve”, tha ai për “Euronews Albania”.
Ai u shpreh se pavarësisht luhatjeve të numrave, në ditët në vijim pritet që numri i qytetarëve të infektuar të ulet ndjeshëm.
“Gjatë këtyre ditëve po, dhe pastaj shpresoj të rikthehet aty ku ishim në ditët e fundit. Mbi të gjitha mbetet vetëndërgjegjësimi i popullatës për mbarëvajtjen e kësaj pandemie në vendin tonë”, shtoi doktori.
