Një tjetër qytetar i Kosovës ka rezultuar pozitiv me koronavirus, duke e çuar në 22 numrin total të të prekurve.
Mjeku Valbon Krasniqi bën me dije se pacienti i ri është familjar i personave të infektuar në Malishevë.
“Mund të them se është konfirmuar edhe një rast i ri me koronavirus në vendin tonë. Është familjar i të prekurve nga Malisheva”, tha ai.
Numri i rasteve me Covid-19 po rritet ndjeshëm në Evropë dhe kudo në botë. Momentalisht koronavirusi po pëson një përhapje të gjerë në Evropë, e cila është kthyer edhe në epiqendrën e këtij virusi të rrezikshëm.
Mbi 10 mijë viktima janë shënuar deri më tani nga koronavirusi në rang global. Teksa janë konfirmuar më shumë se 256 mijë raste, prej të cilëve janë shëruar rreth 90 mijë pacientë.
