Presidenti i Turqisë, Recep Tayyip Erdoğan, ka deklaruar se do vazhdojnë të mbrojnë me një vullnet të fortë dhe me një besim të palëkundur të drejtat dhe interesat e tyre në det.
Në kohën kur u duk se mes palëve ishin ulur ‘gjakrat’, situata është tensionuar edhe më tej. Në ishullin grek që ndodhet pak kilometra larg tokës turke, një dron i cili fluturoi në ajër për rreth 40 minuta njollosi me bojë të kuqe flamurin grek.
Banorët e ishullit thanë se droni kishte altoparlantë që luanin himnin turk. Ai ngjyrosi flamurin grek me të kuqe. Tashmë autoritetet greke po hetojnë për të mësuar se nga kishte hyrë droni në tokën greke.
Ndërkohë, mediat greke kanë nisur sulmet ndaj presidentit turk në lidhje me këtë incident, duke theksuar se të gjithë po tallen me të dhe popullin e tij. “Provokim mizor”, e kanë quajtur mediat greke këtë akt.
Tensionet në krizën e Mesdheut Lindor që shpërtheu midis Turqisë dhe Greqisë, fillimisht u zbehën kur kancelarja gjermane Angela Merkel hyri në lojë si ndërmjetëse. Të dy vendet bënë deklarata për të zbutur krizën midis Ankarasë dhe Athinës, për të cilën shtypi gjerman pretendonte se kishte arritur në prag të luftës. Grekët dhe turqit janë përfshirë në një mosmarrëveshje lidhur me sovranitetin territorial në Mesdhe, si dhe të tabanit nënujor, ku më e rëndësishmja lidhet me rezervat e naftës dhe gazit. Mbetet për të parë reagimin e Turqisë, pas qëndrimit publik të Greqisë!
