Të paktën 17 persona kanë humbur jetën si pasojë e rrëzimit të një aeroplani ushtarak, në një zonë afër qytetit të Rawlpindi-t.
Aeroplani u rrëzua në një fshat të varfër të qytetit që shërben si bazë kryesore e ushtrisë, duke krijuar një shpërthim zjarri i cili ndriçoi qiellin.
“I kemi pranuar 17 trupa të vdekur, në mesin e të cilëve janë 12 civilë dhe pesë anëtarë të ekuipazhit”, tha zëdhënësi i ekipeve të shpëtimit, Farooq Butt, duke shtuar se 12 persona të tjerë janë lënduar në aksidentin që ndodhi afër kryeqytetit të Pakistanit, Islamabad.
Një banor tha se aksidenti ndodhi rreth orës 2 të mëngjesit. “U zgjova nga zhurma e një shpërthimi të madh. Dola jashtë shtëpisë dhe pashë flakë të mëdha”, u shpreh Mohammad Sadiq.
Një banor tjetër, Ghulam Khan, tha se e dëgjoi zhurmën e aeroplanit kur ai kaloi mbi shtëpinë e tij dhe duket se kishte marrë flakë para se të rrëzohej. “Zhurma ishte e frikshme”, tha ai.
Sipas mediave të huaja, aeroplani i rrëzuar ishte në një mision trajnues të zakonshëm, teksa të gjithë të lënduarit janë dërguar menjëherë në spital.
