Rigerta, 10 vjeçarja nga fshati Gurrë e Vogël në Klos, preku zemrat e të gjithëve. Ku mes lotëve, kërkonte dëshpërimisht që dhimbja e këmbës t’i pushonte. Edhe pse ishte në gjendje shumë të rëndë, prej të cilës rrezikonte edhe ecjen, përsëri nga pamundësia ekonomike kontrollet mjekësore ishin të pamundura. Dhe i vetmi trajtim që vogëlushja merrte ishte ta lyente këmbën me një krem, mirëpo asgjë nuk ndryshonte.
Por, duket se gjërat do të marrin një tjetër rrjedhë për Rigertën. Drejtuesi i fondacionit “Fundjavë Ndryshe”, Arbër Hajdari ka bërë me dije se Rigerta tashmë është shtruar në spital dhe po kryhen gjithë ekzaminimet e nevojshme. Në një postim në Facebook, Hajdari shton se sipas mjekëve gjendja e 10-vjeçares është e vështirë, por kujdesi për të, tashmë është i plotë.
Pas postimit nga fondacioni të rastit ekstrem ku ndodhej familja Kurti, reagimi ka qenë i menjëhershëm. Pasi kushtet e skajshme në të cilën jetonin tetë fëmijët, ia rrezikonin çdo ditë e më shumë jetën. Të ndodhur në një fshat të thellë, mundësitë për punë nga prindërit ishin thuajse të pamundura.
Të vetëm në mes të hiçit, për familjen Kurti shpresat ishin shuar. Jetonin në një ndërtesë e cila ishte në gjendje shumë të rëndë. Pa dyer, pa dritare, çdo natë fëmijët flinin në dyshemenë e ftohtë. Me vetëm një dëshirë, që jeta e tyre të ndryshonte e të mos kishin më ftohtë.
Tirana Today mëson se fondacioni “Fundjavë Ndryshe”, nuk është duke u kujdesur vetëm për kurimin e Rigertës. Mirëpo, menjëherë ka nisur puna edhe për ndërtimin dhe sigurimin e banesës për familjen Kurti./ TIRANA TODAY
