Pak ditë më parë, Shqipëria dhe Greqia u dakordësuan që çështjen e kufirit detar ta çojnë në Hagë. Në një deklaratë për mediat, krydemokrati Basha kërkoi që kjo çështje të çohet në Hagë pas zgjedhjeve të 25 prillit.
Ai tha se përgatitja e procesit për të shkuar në gjykatën ndërkombëtare, do të ishte rrezik kombëtar nëse do të ndërmerrej nga kjo qeveri. Kreu i PD-së ka kërkuar që ky hap të ndërmerret nga një qeveri legjitime, e dalë nga zgjedhjet legjitime dhe demokratike.
“Prej 10 vitesh pas vendimit të Gjykatës Kushtetuese, qëndrimi im ka qenë që çështja duhet të trajtohet në organet e drejtësisë ndërkombëtare.
Sot Shqipëria ka nevojë urgjentisht të përgatisë fazën paraprake, sepse kërkohet një punë shumë e madhe. Për fat të keq, nuk është momenti i përshtatshëm. 6 muaj përpara zgjedhjeve, qeveria nuk ka legjitimitetin dhe shkallën e përgatitjes.
Mund të përbëjë rrezik për interesat kombëtare, nëse i lihet në dorë këtij kryeministri procesi i përgatitjes për çuarjen e çështjes në gjykatën ndërkombëtare.
Ky hap të ndërmerret nga një qeveri legjitime, e dalë nga zgjedhjet legjitime dhe demokratike. Procesi i përgatitjes është jashtëzakonisht voluminoz në çdo aspekt të parapërgatijes dhe dërgimit”, deklaroi Basha.
