Për të respektuar kushtet e ruajtjes së shëndetit dhe të respektimit të distancës sociale gjatë pandemisë, administrata do të punojë nga shtëpia. Dje qeveria vendosi që administrata publike të punojë nga shtëpia, si masë kufizuese për parandalimin e pandemisë.
Administrata shtetërore, në varësi të pozicionit që mbajnë punonjësit, do të vazhdojë punën nga shtëpia. Por ndërkohë pjesa tjetër e atyre që punojnë në ambiente me shumë njerëz, rekomandohet të mbajnë distancën nga njëri-tjetri.
Kjo rregullore është miratuar, duke përcaktuar edhe mënyrën se si do të punohet online nga shtëpia të një pjese të administratës publike, por edhe për ata që do të punojnë nga zyra duke respektuar distancën prej 2 metrash. Vendimi mbetet në fuqi, pas rritjes së numrit të rasteve të të infektuarve dhe pas thirrjes nga ana e Ministrisë së Shëndetësisë për të punuar nga shtëpia, aty ku mundet.
Ministria e Shëndetësisë ka publikuar një foto ilustruese si udhëzues, se si duhet të ulemi në ambientet e zyrave me shumë njerëz, për të shmangur kontaktet. “Respektoni në punë rregullat e rekomanduara për parandalimin e COVID-19”, shkruan MSH.
