Kryebashkiaku Erion Veliaj, në një intervistë në “Pop Culture” të dhënë një vit më parë, tha se “çunat shqiptarë janë zdromsa”. Ky term ka tërhequr vemendjen jo vetëm të kundërshtarëve të tij politikë, por edhe të vetë kryeministit Rama, ku dhe kanë pasur diskutime.
Kreu i qeverisë së bashku me Veliajn ishin në Petrelë, për inagurimin e rindërtimit të një shtëpie të shembur nga tërmeti. Ndërsa po shpërndante dhurata për fëmijët e familjes, Veliaj bëri kompliment ndaj djalit të vogël të shtëpisë, ndërsa Rama tha në shaka se nuk ka të bukur e të shëmtuar por ka djem të mirë dhe vajza më të mira, ndërsa me ‘zdromsat mos na merr në qafë’.
“Mos thuaj më i bukur i shëmtut, se na merr në qafë kot. Na more në qafë, ti që the çunat janë zdromsa, mos i hy më këtë muhabeti. Çunat janë të mirë, gocat janë më të mira, por s’janë zdromsa. Ku e gjete ti zdromsat? E di unë për ça e ke ti, s’na u ndanë zdromsat, por nuk janë të gjithë si ata”, tha Rama.
Por kjo gjë është risjellë sërish në fokus, teksa Veliaj ka qenë i ftuar në emision “Rudina”. Ai e lidhi fjalën zdroms me bashkëshorten e tij, duke thënë se ajo e quan zdroms sa herë që nuk bën ndonjë rregullim në shtëpi.
“Unë jam shumë i përgjegjshëm. Vërtet bëj humor dhe them ne çunat jemi zdromsa, e di çfarë domethënë zdromsa? Se shumë njerëz ofendohen dhe them pse ofendohesh për diçka që nuk e kupton? Ofendohen se janë i një grupimi politik dhe po e thashë unë, është gjë e keqe. Kur ishim të vegjël, mosha jonë, nga varfëria ne luanim me peta, me cingla, me pulla, këto lojëra kala dibrançe dhe me kopaca. Dhe kur ti shkëmbeje, si pulla, kishte një lloj tregu informal të çunave që shkëmbenin në këtë lojën me kopaca. Ti mund ta shikoje me sy që ishte i drejtë, por mënyra si ‘zyrtarisht’ testohej nëpër lagje, sa i drejt ishte një kopac, ishte kur e gjuaje me një shënjestër. Nëse kishte një trajektore të drejtë ishte i vërtetë dhe ia vlente të shkëmbej. Por nëse fillonte drejtë dhe devijonte quhej zdroms. Gjuajtje ishte drejtë, qëllimi ishte i mirë, por devijonte rrugës. Unë e vuaj në shtëpi këtë, se nëse prishet një gjë në shtëpi, bojleri, digjet një llampë, duhet vendosur një kornizë, unë gjej gjithmonë justifikime pse s’bëhet, ja se erdha vonë, ja se ika herët. Dhe Ajola thotë: “Ti qofsh, të rregullosh gjithë Tiranën dhe mos të prekësh gjë me dorë në shtëpinë tënde, ju jeni tamam zdromsa”.
