Drejtori i DPSHTRR, Blendi Gonxhja, duke iu referuar zërave për rritje të çmimit të biletës, e ka hedhur poshtë këtë si mundësi. Në një intervistë për ‘Report TV’, ai ka hedhur poshtë çdo mundësi për rritje të çmimit të biletës me 30%.
“Nuk mund të ketë rritje të çmimit, pa u konsumuar të gjitha llojet e mënyrave që ne duhet të konsumojmë të gjejmë për të ndihmuar njëri-tjetrin. Mund të ketë rimbursime, mund të ketë përpjekje për subvencione të pjesshme apo pagesa për kilometër. Biletat nuk mund të rriten dot as se e thotë një kryetar shoqate dhe as se e thonë pronar kompanish”, shprehet drejtori i DPSHTRR.
Ndonëse nuk ka një afat të caktuar se kur do të fillojë transporti urban, Gonxhe zbulon disa nga propozimet e bëra nga drejtoria për mbarëvajtjen e transportit. Me rregullat e reja që do përshtatemi pas situatës me koronavirusin, mjaft rëndësi do ketë roli i policit bashkiak. Po kështu do të hiqet faturino dhe se shoferi i mjetit do të jetë i izoluar.
“Kemi propozuar që të jenë me kapacitet 1/3 apo 1/2 për shumicën e këtyre autobusëve. Do të ndahet hyrja e parë nga hyrja e dytë, ka raste që shoferi duhet të izolohet nga pjesa tjetër e autobusit. Do të shmanget absolutisht pjesa e faturinos dhe ky është një problem kyç, dhe duhet që me policinë bashkiake të veprojmë. Por ka bashki që nuk kanë fare polici bashkiake”, tha Gonxhja.
Shkak për këtë izolim total të qarkullimit, sipas Gonxhes, është bërë edhe mungesa e hekurudhave në vend. Pasi sipas tij, nëse do të mund të funksiononin trenat, situata do të ishte tepër e lehtë dhe qytetarët do të mund të lëviznin dhe duke ruajtur distancën.
