Cristiano Ronaldo ishte kthyer në një “çështje” për Realin e Madridit, pasi ky i fundit kishte kërkuar rinovimin e kontratës dhe kushte më të mira financiare duke parë pagat që merrnin yjet e tjerë. Me paraqitjet që ka dhuruar portugezi kohët e fundit duket se çdo gjë është rregulluar dhe drejtuesit madrilenë duket se janë bindur me kërkesat e tij edhe pse vitet kalojnë.
Mediat spanjolle bëjnë me dije se tani është klubi që i ka shfaqur dëshirën Ronaldos për të rinovuar kontratën e cila do të shoqërohet edhe me rritjen e pagës. Këtë ia kishte premtuar edhe presidenti i Realit, Florentino Perez pas finales së Ligës së Kampioneve të 2017-s, të luajtur në Cardiff.
Nga ajo që raportohet nga mediat ishte Drejtori i Përgjithshëm i Realit të Madridit, Jose Angel Sanchez ai që komunikoi me 33-vjeçarin, duke i bërë të ditur faktin se në klub të gjithë kanë mbetur të kënaqur me rendimentin e tij në këto muaj dhe për këtë ai do të marrë shpërblimin e merituar.
Burime pranë Realit të Madridit bëjnë të ditur se paga e Cristiano Ronaldos do të rritet nga 21 milionë në 30 milionë Euro, shifër së cilës do t’i shtohen edhe 2 milionë të tjerë në rast se arrihen objektivat, ndërkohë që kontrata e re do të skadojë në 2021.
