Juventusi ka arritur të mposhtë Valincian në “Mestalla” edhe pse që në pjesën e parë luajti me 10 lojtarë. Ishte Cristiano Ronaldo që u ndëshkua me karton të kuq pas një përplasje në hyrje të zonës me mbrojtësin Murillo. Më pas portugezi e prek në kokë për të lënë të kuptohet se nuk i bëri asgjë, por arbitri e vlerësoi për karton të kuq. Më pas është Miralem Pjanic që shndërron në gola dy penallti për ti dhënë fitoren Juventusit.
Real Madrid vazhdon të vërtetojë se në Champions League janë ekip me fytyrë tjetër. Të besuarit e Lopeteguit kanë mposhtur në “Santiago Bernabeu” Romën me rezultatin 2-0. Ishte Isco në minutën e fundit të pjesës së parë që shënon një gol spektakolar nga goditje dënimi, duke e lënë portierin në vend.
Ndërsa në pjesën e dytë Luka Modric jep një asist fantastik për Bale i cili shfrytëzon të gjithë shpejtësinë dhe lë pas mbrojtësit, i vetëm përballë portierit e ka mjaft të lehtë të shënojë. Ndërsa goli i tretë është shënuar në fundin e takimit nga Mariano Diaz, futbollisti që mban në shpinë numrin 7.
Ashtu si pritej, Manchester United do ta kishte mjaft të lehtë përballë zviceranëve të Young Boys. Ishte Paul Pogba që shënon një dopietë në pjesën e parë, për ta bërë më të lehtë ndeshjen për anglezët. Në pjesën e dytë është Martial që gjen golin e tretë. Interesant është fakti që kanë shënuar dy lojtarë që nuk kanë marrëdhënie aspak të mira me trajnerin Mourinho.
Surpriza e mbrëmjes ishte disfata e Manchester City në “Etihad Stadium”. Të besuarit e Guardiolas janë mposhtur nga Lyon me rezultatin 1-2. Golat e Cornet dhe Fekir në pjesën e parë e kanë bërë të pavlefshëm atë të Bernardo Silvas.
Në ndeshjet e tjera të luajtura në Champions League, Bayern Munich ka mposhtu Benfican në transfertë me rezultatin e pastër 2-0, me gola të Lewandowskit dhe Renato Sanches. Ndërsa Plzen ka barazuar në shtëpi me CSKA-në e Moskës me rezultatin 2-2.
