Napoli ka pësuar një humbje të rëndë përballë Romës në “San Paolo”, në momentin që fitorja ishte detyrim për djemtë e Maurizio Sarrit. Ishte një ndeshje e pabesueshme ku napolitanët gjen golin të parët por më pas shpërbëhen dhe pësojnë 4 të tillë.
Ishin vendasit ata që kaluan të parët në avantazh me anë të Lorenzo Insigne. Aty dukej sikur vendasit do të dominonin dhe do të fitonin ndeshjen e radhës ndaj një Roma në një formë të dobët, por dy gola të shpejtë të Cengiz Under dhe Edin Dzeko përmbysën gjithçka që në pjesën e parë. pas pushimit skuadra e Sarri-t dukej e nervozuar dhe mbase e ndikuar psikologjikisht nga triumfi i Juventus-it ndaj Lazio-s.
Vendasit nuk arritën për asnjë moment të futeshin në lojën e tyre teksa Roma i goditi me dy gola të tjerë brenda pesë minutave me Dzeko dhe Perotti. Një humbje e rëndë për Napolin, që tani mbetet një pikë përpara Juve-s por me një ndeshje më shumë.
Ndërsa Roma është ngjitur në zonën Champions dhe do të presë një dhuratë nga Milan ditën e diel në derbi ndaj Inter-it për të ruajtur vendin në renditje. Në fund Mertens ngushton diferencën por goli i tij ishte më tepër ngushëllues se sa shërbente për ndonjë gjë tjetër.
