Kreu i Kadastrës Artan Lame, në një konferencë për shtyp dha sot detaje për procesin e rivlerësimit të pasurive të paluajtshme. Ky proces zgjati 2 vite nga momenti që u hap, dhe u shty disa herë për shkak të kërkesave të shumta të qytetarëve. Lame bëri të ditura edhe shifrat se sa procese rivlerësimi u kryen. Tirana është qyteti me numrin më të madh për rivlerësimin e pronës.
“Ata që morën rivlerësimin janë 113 mijë familje. Gjithashtu mbetën dhe 398 familje, pasuri, për të cilët nuk u përfundua procesi i rivlerësimit në ditën e fundit, në datë 2 gusht.
Rekordin e mban Tirana me një shifër të paimagjinueshme, 47.293 rivlerësime të kryera. Kjo tregon dhe për zhvillimin e qytetit dhe bumin e transaksioneve në qytet. Vendin e fundit e mban Hasi me 35 rivlerësime”.
Procesi i rivlerësimit të pronave i dha buxhetit të shtetit 12.7 miliardë lekë.
“Procesi dha në buxhetin e shtetit 12.7 miliardë lekë, rreth 110 milionë dollarë. Është një shifër që tejkalon çdo shifër të proceseve të viteve të mëparshme”, u shpreh Artan Lame.
