Ish-Sekretari i Përgjithshëm i PD-së Arben Ristani, ka thënë se Lulzim Basha duhet të marrë shembullin e PD-së në vitin 2004, e cila hapi partinë ndaj prurjeve të reja edhe më pas, një vit më vonë në vitin 2005 fitoi zgjedhjet.
I ftuar në emisionin “Top Talk” në Top Channel, Ristani këshilloi Bashën që t’i thërrasë të gjithë ata që kanë çfarë t’i thonë publikut shqiptar, që kanë kontribuar, që kanë eksperiencë dhe që mund të japin për Partinë Demokratike.
“Berisha në vitin 2004 e hapi Partinë Demokratike, tërhoqi të gjithë kontribuuesit në PD, qofshin ata edhe ish-kundërshtarë të tij të mëparshëm. Pra është një shembull që ne e kemi dhe kemi brenda forcës sonë politike dhe që unë ngul këmbë që duhet bërë që Partia Demokratike të bashkohet. Të hapet, të thërrasë të gjithë ata që kanë çfarë t’i thonë publikut shqiptar që kanë kontribuuar që kanë eksperiencë dhe që mund të japin për Partinë Demokratike”, tha ai.
Ndërkohë kur u pyet për gjendjen e tanishme të opozitës, Ristani u shpreh se:
“Duhet të kemi të parin qëllimin, ku duam të shkojmë, duam ta sjellim PD-në në pushtet apo jo? Kjo do qartësi edhe për rrugën që duhet të ndjekim sepse nuk duhet të gjendemi si në një pyll të errët ku provojmë të ecim majtas apo djathtas. Na duhet një rrugë e qartë se ku duhet të shkojmë dhe çfarë duhet të bëjmë për të arritur qëllimet e organizatës, pra të PD-së. Këtu duhet gjetur momenti që dëshirat e brendshme apo nevojat e individit të përputhen me nevojat e organizatës”.
