Ka rinisur kolaudimi i automjeteve. Pas katër muajsh pezullim, tashmë do të rinisë kontrolli teknik i mjeteve, por me disa ndryshime të rëndësishme. Drejtori i DPSHTRR, Blendi Gonxhe, ka shpjeguar se atyre që iu skadon së shpejti certifikata e kontrollit teknik të mjeteve nuk kanë përse të shqetësohen, pasi procesi nuk do të hapet me ta. Ai ka sqaruar se, me ndryshimet që ka pësuar Kodi Rrugor, vlefshmëria e kontrollit të kryer vitin e shkuar, praktikisht shtyhet edhe me një vit tjetër. Ai ka marrë shembuj konkret për të sqaruar këto ndryshime. “Nëse vlefshmëria e certifikatës së një mjeti skadon në datën 1 qershor 2021, nuk kanë përse të paraqiten për kolaudim në atë datë, por në 1 qershorin e vitit 2022. Për qarkullimin do të njoftohen organet e Policisë dhe ndërkaq del edhe udhëzimi përkatës”, tha Gonxhe.
Si do e “gjejmë” rradhën e kontrollit
Për të shmangur radhët në subjektet e kontrollit teknik janë përcaktuar një kategori automjetesh që e kanë emergjencë futjen në lupën e kontrollit teknik. Bëhet fjalë për mjetet që u kthyen mbrapsht vitin që shkoi, ato që hynë në Shqipëri gjatë kohës që kolaudimi nuk funksiononte si shërbim, si dhe një sërë mjetesh në funksion komunitar. “Shërbimi do të nisë së pari me mjetet që janë refuzuar në kolaudim vjet, pra ata pa certifikata të vlefshme dhe që s’kanë përfituar as shtyrje afati, as zgjatje afati. Pastaj kemi mjetet me kilometra të regjistruara pas datës 31 dhjetor 2020 që do t’i nënshtrohen kolaudimit për herë të parë. Përveç tyre janë dhe mjetet taksi, autoshkolla, ato që shërbejnë për transport udhëtarësh e ambulanca që u është bërë 12- mujorshi, 6+6. Pra, kanë kapur afatet e normave të reja të ndryshuara. E kështu gradualisht do të ecim”, sqaron Blendi Gonxhe. Kategoritë e automjeteve të përmednura nga Gonbxhe përllogariten të jenë diku rreth 150 mijë të tilla.
Si do njoftohen
Me hapjen e shërbimit të kolaudimit, pronarët e automjeteve nuk mund të paraqiten kur të duan, por me të marrë njoftimin. Kjo është faza emergjente, që fut në shina procesin e kolaudimit, tashmë si shërbim shtetëror. “Mjetet përfituese të rregullave të reja do të njoftohen në sistem përmes ‘e-Albania’ apo në rrugë të tjera për skadencën e tyre”, shton drejtori Gonxhe. Ndërkohë që pritet botimi në Fletoren Zyrtare, një udhëzim me detajet e procesit të kolaudimit është drejt përfundimit për t’u publikuar ditët në vijim.
