Rinisin hetimet për ekzekutimin mafioz të bankierit, Artan Santo të ndodhur 7 vite më parë. Prokuroria ka shpallur moskompetencën dhe ia ka dorëzuar SPAK duke qenë se ka dyshime të forta se eliminimi i tij është kryer nga një grup kriminal dhe vrasës me pagesë.
Në janar të këtij viti, Prokuroria e Tiranës bëri një kërkesë për rihapjen e kësaj dosjeje, pasi ishte pezulluar për mungesë provash nga ana e prokurorëve Naim Tota dhe Shpëtim Garunja, të cilët ia kaluan çështjen për ndjekje hetimore të mëtejshme Drejtorisë Vendore të Policisë në Tiranë.
Por, tashmë, dosja e bujshme është në duart e Prokurorisë së Posaccme kundër Korrupsionit dhe Krimit të Organizuar. Ende nuk dihet se në cilat indicje apo prova është bazuar vendimi për rihapjen e çështjes së kësaj vrasjeje, por dyshohet se bankieri u eliminua nga një grup i strukturuar kriminal.
Si ndodhi vrasja
Artan Santo u ekzekutua në 26 qershor të vitit 2014 përpara zyrës së tij të punës në ish-Bllok. Biznesmeni ka qenë duke shkuar në punë, teksa papritur dy persona e kanë qëlluar me armë zjarri. Ata janë larguar më pas menjëherë nga vendngjarja.
Autorët e vrasjes së Santos kanë organizuar çdo gjë në mënyrë perfekte, pasi kishin ndjekur itinerarin e biznesmenit. Në momentin e vrasjes, autorët kanë qenë të maskua, dhe kamerat e shumta të sigurisë në këtë zonë nuk i kanë identifikuar. Ata kanë kryer ekzekutimin dhe janë larguar pa asnjë gjurmë.
