Ditën e sotme nga foltorja e Kuvendit kryeministri Edi Rama theksoi se nëse shqiptarët nuk do të punojnë në kantierët e rindërtimit atëherë vendet do t’i zënë punëtorët e huaj.
Ndër të tjera Rama deklaroi se të gjithë punëtorët që do të punojnë për rindërtimin e objekteve të dëmtuara nga tërmeti i 26 nëntorit, do të paguhen me rrogën mesatare 420 euro.
“Ne do të hapim kufijtë edhe për punonjësit e huaj, do t’i japim mundësi kompanive që të rekrutojnë punonjës të huaj për të ardhur për të punuar në Shqipëri në rast se kjo do të jetë e nevojshme si pasojë e vendeve të punës që nuk plotësohen me punonjës vendas.
Në këtë sfidë ne kemi mundësinë që me avantazhin e krijuar me një procedurë të lehtësuar prej 7 ditësh, të kemi punonjës nga jashtë për të gjithë sektorët që vuajnë shumë për mungesë të krahut të punës si pasojë e refuzimit të shumëkujt për të punuar në sektorin privat në pritje të një pune në shtet”, pohoi Rama.
