Ministrja e Shëndetësisë Manastirliu, komunikoi një ditë më parë lehtësimet pas shpërthimit të epidemisë. Duke filluar nga sot, nuk do të ketë kufizime oraresh në të gjithë Shqipërinë, duke lejuar edhe bizneset që të qëndrojnë hapur pa asnjë problem.
E ndaluar do të jetë vetëm dalja nga zonat e kuqe në ato të gjelbërta, të paktën deri të hënën kur edhe ky kufizim do të hiqet.
Ndërsa nga 1 qershori do të hapen të gjithë kufijtë tokësorë me vendet fqinje, do të rifillojnë aktivitetet sportive pa praninë e publikut, si dhe do të hapen kopshtet dhe çerdhet.
Plazhet do të jenë të hapura duke filluar nga e hëna, por vetëm për hotelet, ndërsa për qytetarët do të hapen në datën 10 qershor. Deri në 23 qershor do të ndalohet hapja e klubeve të natës, kinemave, pishinave, tubimet dhe organizimet e mëdha.
