Gjatë javëve të fundit, Shqipëria po përballet me një numër në rritje të rasteve të reja të infektimeve. Madje këto kanë qenë shifrat më të larta të regjistruara që prej fillimit të pandemisë. Ndodhur në këto kushte, Komiteti Teknik i Ekspertëve, ka vendosur të rikthejë izolimin në vend.
Dje në një dalje emergjente, zëvendësministrja e Shëndetësisë, Mira Rakacolli, deklaroi se nga e mërkura, të gjitha bizneset do të mbyllin aktivitetin nga ora 10 e mbrëmjes deri në 6 të mëngjesit. Në këto fasha orari nuk do të lejohet as lëvizja e qytetarëve në rrugë, përveç atyre që dalin për arsye pune apo për raste urgjente.
Sipas saj, këto masa do të zgjasin deri në 3 javë, dhe më pas do të bëhet rishikimi i tyre në bazë të situatës.
Masat do të rishikohen çdo javë në varësi të situatës dhe dinamikës së ngjarjeve. Këto vendime janë marrë në bazë të rekomandimit të OBSH, për planin anti-covid vjeshtë-dimër.
Çfarë pritet të ndodhë me shkollat?
Shkollat nuk do të mbyllen, dhe deri më tani nuk është menduar të merret ndonjë masë tjetër shtesë ndaj tyre. Mira Rakacolli deklaroi se do të mbeten të pandryshuar masat për shkollat, pasi gjendja në këto institucione shfaqet e qëndrueshme.
“Maskat kanë dhënë rezultat, pasi në të kundërt shifrat do të ishin detyrimisht më të larta. Gjatë hetimit epidemiologjik, më të shumtat e rasteve nuk i kanë përdorur maskat në shumë raste.
Unë shpjegova që çdo masë që merret, merret për shkak të shifrave. Ne nuk na rezulton që në shkolla të kenë një shpërndarje më të madhe të koronavirusit.
Ne po vazhdojmë monitorimin dhe gjithmonë masat do të jenë në dinamikë me rritjen e të infektuarve. Shkollat nuk kanë influencuar në rëndimin e situatës”, tha Rakacolli.
Ndërkohë, Drejtori i Urgjencës Kombëtare, Skënder Brataj, deklaroi se çdo javë do të ketë një komunikim nga Komiteti Teknik i Ekspertëve të Shëndetësisë për mediat, mbi situatën me masat kufizuese dhe situatën epidemiologjike.
