Ashtu si në vendin tonë, edhe Italia ka rihapur baret dhe restorantet ditën e sotme, pas më shumë se 2 muajsh që ishin mbyllur nga koronavirusi.
Por kryeministri italian, Giuseppe Conte ka paralajmëruar se vendi duhet të ketë kujdes ndaj një rishfaqjeje të dytë të pandemisë.
“Sot vendi po lëviz përsëri, por është akoma në rrugë të gjatë dhe ne kurrë nuk duhet ta ulim vigjilencën tonë”, tha ai.
Conte tha se është e domosdoshme që qytetarët të vijojnë të respektojnë distancën sociale dhe përdorimin e maskave të fytyrës. Kryeministri Conte theksoi se dekretet e fundit të qeverisë nuk mund të jenë zgjidhje për të gjitha aspektet ekonomike dhe problemet sociale.
“Qeveria po punon ditë e natë për të bërë më shumë përpjekje për të dalë nga urgjenca COVID-19. Qeveria nuk është e shurdhër për shumë njerëz në vështirësi”, shtoi ai.
