Gjykata e Apelit Administrativ ka rrëzuar sot padinë e kandidatit Lulzim Alushaj për skualifikimin e tij nga KLP në garën për Prokuror të Përgjithshëm. Padia e avokatit ishte dhe “pengu” që mbante të mbërthyer vijimin e garës për tre kandidatët e tjerë, Olsjan Cela, Fatjona Memçaj dhe Kryeprokurorja e Përgjithshme e Përkohshme, Arta Marku.
Ngërçi i krijuar ishtë rezultat i shtyrjes për herë të dytë të vendimit të Gjykatës së Apelit Administrativ për shqyrtimin e ankimimit të avokatit Lulzim Alushaj. Avokati u skualifikua nga Këshilli i Lartë i Prokurorisë, me argumentimin se nuk plotësonte kushtin që të kishte 15 vjet përvojë pune si jurist i spikatur.
Më 25 shtator, KLP-ja shqyrtoi dosjet e plota të 4 kandidatëve në garë për Prokuror të Përgjithshëm, duke skualifikuar njërin prej tyre, konkretisht avokatin Lulzim Alushaj. Duke shqyrtuar dosjet sipas rendit alfabetik, Këshilli vendosi se dokumentacioni i paraqitur nga kandidatja Arta Marku i plotëson kushtet ligjore për të vazhduar garën më tej. Të njëjtin vendim mori edhe për kandidaten Fatjona Memçaj dhe Olsian Çelën, q[ i plotësojnë kushtet ligjore për të vazhduar garën më tej. Ndërsa për kandidatin Lulzim Alushaj u deklarua se nuk plotëson kushtin e pasjes 15 vjet përvojë pune si jurist i spikatur, që parashikohet ne nenin 148/ a pika 3 të Kushtetutës dhe ligjin 97/2016 “Për organizimin e funksionimin e Prokurorisë”.
KANDIDATËT
Kryeprokurorja e Përkohshme Arta Marku ka mbaruar studimet e larta dhe Magjistraturën në Universitetin e Tiranës. Pasi ka kryer stazhin për 2 vjet në Prokurorinë e Fierit, ka ushtruar funksionin si prokurore në Prokurorinë e Rrethit Gjyqësor Shkodër për 15 vite. Për 7 vjet ka qenë drejtuese e Njësisë së Përbashkët Hetimore për Krimin Ekonomik dhe Korrupsionin në Prokurorinë e Rrethit Shkodër, si dhe zëvendësdrejtuese e Prokurorisë së Rrethit Gjyqësor Shkodër. Fatjona Memçaj, aktualisht prokurore në Prokurorinë e Apelit Tiranë, në vitin 2003 mbante postin e prokurores së Rrethit në Tiranë. Në vitin 2007, Memçaj ka punuar si drejtoreshë e Koordinimit Ligjor në Presidencë, detyrë të cilën e ka mbajtur deri në fund të vitit 2012. Më pas, Memçaj është emëruar drejtore kabineti në Prokurorinë e Përgjithshme dhe prej vitit 2013 mban pozicionin e prokurores së Apelit në Tiranë. Gjithashtu, Memçaj është përfshirë edhe në mësimdhënie. Më herët, drejtues i Prokurorisë për Krime të Rënda dhe aktualisht prokuror të në këtë prokurori, Olsian Çela ishte kandidatura e parë e dorëzuar pranë KLP-së. Prokurori Olsian Çela ka punuar në Prokurorinë e Tiranës, pasi përfundoi Magjistraturën në vitet 1998-1999. Gjithashtu, ka kryer edhe një sërë trajnimesh e specializimesh brenda dhe jashtë Shqipërisë për hetimin e trafiqeve të paligjshme dhe krimit të organizuar.
