Ministri i Brendshëm, Bledi Çuçi prej dy ditësh ndodhet në Bejrut të Libanit, për procesin e riatdhesimit të shtetasve shqiptarë, që ndodhen në kampet siriane.
Çuçi është takuar me drejtorin e përgjitshëm të sigurisë në Liban, Gjeneral Major Abas Ibrahim, të cilin e falenderoi për kontributin e tij në procesin e kthumit të shqiptarëve që ndodhen në Siri.
Ai tha se qeveria shqiptare do të [punojë me përkushtim dhe vendosmëri për të finalizuar me sukses edhe këtë operacion, ashtu siç ndodhi edhe herën e kaluar.
Postimi i Çuçit në rrjetin social, Facebook
Në vijim të angazhimit të qeverisë shqiptare për riatdhesimin e shtetasve shqiptarë që ndodhen në kampet siriane, prej dy ditësh ndodhem në Beirut. Bashkë me Konsullin e Përgjithshëm të Shqipërisë në Liban, Marc Ghorayeb dhe Drejtorin e Drejtorisë së Antiterrorit në Policinë e Shtetit, Gledis Nano, zhvillova një takim me drejtorin e përgjitshëm të sigurisë në Liban, Gjeneral Major Abas Ibrahim.
E falenderova Gjeneralin për gjjthë kontributin e tij të çmueshëm në këtë proces dhe e garantova për vijimin e bashkëpunimit mes dy vendeve tona në çështje të sigurisë dhe sidomos në finalizimin me sukses të këtij operacioni të vështirë në një kohë sa më të shkurtër. Vizita në Beirut është gjithashtu tregues domethënës i këmbënguljes së qeverisë shqiptare për riatdhesimin e shtetasve shqiptarë nga Siria. Do të punojmë me po të njëjtin përkushtim dhe vendosmëri për të finalizuar me sukses edhe këtë operacion ashtu sikundër bëmë radhën e parë.
