Pak orë pasi përfundoi procesi i votimeve në Serbi, janë bërë publike edhe rezultatet preliminare të cilat nxjerrin fituese partinë e Aleksandar Vuçiç, me 62,7 përqind.
Sipas këtyre rezultateve, Alternativa Demokratike Shqiptare ka fituar 4 vende në Parlamentin e Serbisë. Partitë shqiptare në Luginën e Preshevës kanë bashkuar forcat dhe kanë marrë pjesë me një koalicion të vetëm në zgjedhjet e përgjithshme të Serbisë.
Nëse rezultatet nuk ndryshojnë, ky është numri më i madh i deputetëve që kanë fituar ndonjëherë partitë shqiptare në parlamentin serb.
Partia e Vuçiçit ka marrë 180 mandate, SPS e Ivica Daçiçit 30 mandate ndërsa ajo e ish-sportistit Aleksandar Shapiq ka marrë 11 mandate.
Zgjedhjet u mbajtën edhe në Kosovë, nën mbikëqyrjen e OSBE-së.
