Presidenti i Republikës, Ilir Meta tha sonte se nuk e kishte menduar kurrë që Shqipëria do të votonte kundër SHBA-ve. Gjatë një interviste për ‘Opinion’ Meta ka reaguar sërish lidhur me votoi pro rezolutës së OKB që kundërshtonte vendimin e Donald Trump për shpalljen e Jerusalemit si kryeqytet të Izraelit.
“Asnjëherë nuk kam menduar personalisht se mund të ndodhte një votim i tillë në një situatë të tillë kur kërkesat kanë qenë publike të bëra dhe nga Presidenti i SHBA-së dhe nga Ambasadorja e SHBA-së në OKB. Nuk ka pasur asnjëherë një rekomandim apo një sugjerim, apo udhëzim që Ambasadori ynë të dënojë një veprim sovran të SHBA. Qëndrimet e Shqipërisë për çështje të rëndësishme, të jenë të mirëkonsultuara. Për çështje të rëndësishme duhet konsensus i gjerë. Qëndrimet e Shqipërisë për çështje të rëndësishme sidomos në raport me aleatët tanë më të rëndësishëm duhet të jenë mjaft të qëndrueshme, të besueshme dhe të mirëkonsultuara. Pra, duhet të reflektojnë një konsensus madje jo vetëm shtetëror, por edhe një konsensus më të gjerë për arsye sepse kemi çështje të rëndësishme siç është ende çështja e Kosovës, çështjet e shqiptarëve në rajon të cilat na kërkojnë përgjegjshmëri të madhe për të ruajtur besueshmërinë ndërkombëtare”, tha Meta.
