“Nuk ka reklamë të keqe apo të mirë, mjafton të përmendesh”. Ky ishte një ndër mësimet që ka marrë Rezarta Shkurta, teksa bashkëshorti i saj Ermal Hoxha, nipi i diktatorit Enver Hoxha ndodhej në burg, pas aksionit për shpërbërjen e laboratorit të kokainës në Xibrakë.
Mbrëmjen e djeshme, ajo rrëfeu në ”Soirée”, një nga periudhat më të errëta të jetës së saj, në të cilën iu rrezikua dhe biznesi. Por teksa mendonte se biznesi i saj ishte drejtë fundit, çdo gjë ndryshoi për mirë, pasi fitimet ju dhjetëfishuan. Ndonëse sulmet ndaj saj ishin të shpeshta, ajo tha se ia doli në kohën kur mendonte se do të falimentonte.
“Unë kisha vetëm katër muaj biznes në momentin që ndodhi problemi im familjar, që tashmë dihet, dhe përveçse sigurisht sulmuan tim shoq me të drejtë, më sulmuan dhe mua. Faktikisht ka qenë e padrejtë, sepse njeriu mund të mbajë përgjegjësinë për veprimet e veta dhe unë isha një nënë e re asokohe, që kisha hapur një biznes dhe kisha vetëm katër muaj biznes.
Filluan “Rezarta pastrim parash me Hera Company”, që edhe nëse do të bëhej pastrim parash, nuk kishte ngelur tek një studio fotografike. Së dyti ne kishim realizuar një foto, ishte një fëmijë i vogël me një llullë. Faktikisht nuk ishte një ide origjinale, ne e kishim marrë nga një fotograf i famshëm francez.
Gazeta: Rezarta jep shembull të keq për fëmijët, dmth reklamon duhanin. Kjo në atë hark kohor kur ishin dhe gjithë ato lajmet e tjera. U bë aq e madhe, unë e përjetova keq sa mendova, tani u mbyll Hera Company. Isha e sigurt që Hera Company famimentoi. Ai muaj është mbyllur her dhjetë. Seriozisht, her dhjetë fitim, kur unë mendova se falimentova, me sinqeritetin më të madh. Mësimi që nxorra, nuk ka reklamë të keqe apo të mirë, mjafton të përmendesh”, u shpreh ajo.
