Revolta për vrasjen e 25-vjeçarit, Klodian Rasha ka kaluar kufijtë e Shqipërisë. Ndërsa i gjithë vendi “është ngritur në këmbë” në kërkim të drejtësisë për të riun, të njëjtën gjë kanë bërë edhe shqiptarët që jetojnë në Londër.
Ata janë mbledhur që prej orës 16:00 para Ambasadës Shqiptare në Londër, ndërsa mbajnë pankarta në duar dhe telefona me dritë ndezur, në shenjë revolte për vrasjen e Klodianit.
Ata brohoritën njëzëri “Drejtësi për Klodianin”, “Unë jam Klodiani”, ”Sot ti, nesër ne”, ndërsa protesta ka qenë paqësore.
Dita e dytë e protestës për vrasjen e 25-vjeçarit, Klodian Rasha u shoqërua me dhunë dhe përplasje midis protestuesve dhe forcave të policisë.
Kjo detyroi Ministrin e Brendshëm, Sandër Lleshajn që të japë dorëheqjen e parevokueshme nga posti.
Klodian Rasha u ekzekutua këtë të martë, më 8 dhjetor. Ngjarja ka ndodhur në zonën e Laprakës në kryeqytet, pasi i riu kishte dalë orët e para të mëngjesit jashtë banesës së tij, duke thyer orën policore.
