Vritet një shqiptar në Brazil, i punësuar në një kompani italiane, në qytetin e njohur si Fortaleza. Viktima është identifikuar si 28-vjeçari Alban Gropcaj, ndërsa shefi i tij, shtetas italian i identifikuar si Guido Bertola, ka mbetur i plagosur.
La Stampa shkruan se shqiptari dhe italiani janë sulmuar në momentin që kanë dalë nga një lokal dhe po tentonin të hapnin makinën e tyre. Në këtë çast, disa persona me dy motoçikleta iu janë afruar dhe nën kërcënimin e armës, u kërkuan atyre paratë. Shqiptari ka refuzuar t’u jepte paratë, duke u qëlluar më pas me armë nga një prej autorëve dhe mbeti i vdekur.
Ndërsa italiani Guido Bertola pësoi lëndime të vogla dhe është jashtë rrezikut për jetën. Ky i fundit është pronar i një zdrukthëtarie dhe së bashku me punëtorin shqiptar besohet se kishin shkuar në Brazil për një udhëtim pune.
