Ministri i Jashtëm në detyrë, Gent Cakaj, ka komentuar vendimin e kryeministrit të Maqedonisë së Veriut, Zoran Zaev, për të shpallur zgjedhjet e parakohshme në vend.
Në një intervistë për KTV, Cakaj krahason situatën mes Shqipërisë dhe Maqedonisë, teksa thekson se pikë e rëndësishme dalluese janë kushtet që janë përmbushur, punët e brendshme dhe referendumi që ishte bërë në Maqedoni me rastin e ndryshimit të emrit.
“Ka disa gjëra që duhet të sqarohen, e para është fakti se dy vendet janë njëjtë të zhvilluara në rrugën evropiane, por s’do të thotë se dy vendet qëndrojnë njëjtë brenda. Shqipëria e Maqedonia kanë merituar hapjen e negociatave sepse kanë përmbushur kushtet, por kushtet s’ishin të njëjta.
Sepse Maqedonia s’ka pasur obligim të kryejë vettingun, por adresimin e prioriteteve nga marrëveshja e vitit 2015 dhe mbylljen e problemeve me Greqinë. Shqipëria ka pas kushte tjera. S’ka pas bazë të ndodhë ndarja, sepse të dyja kanë përmbushur detyrat. Nga qershori 2018 kur edhe realisht filloi procesi, por që u shty vendimi, morëm mësim që procesi i çeljes së negociatave varet nga dy shtylla, dinamika e reformave të brendshme dhe trendi i reformave në Evropë.
Kemi ulur pritjet duke mos bërë zotime të prera se negociatat do të hapen, e te Maqedonia pati referendum për ndryshim të emrit shtetëror dhe në vetë pyetjen ishte nëse qytetarët pranojnë ndryshimin e emrit në këmbim të perspektivës evropiane. BE-ja s’mbajti premtimin me këtë rast”, u shpreh Cakaj.
Ministri shton se një faktor tjetër është se Maqedonia s’ka barriera që pamundësojnë një proces të brendshëm zgjedhor dhe se në shumën e kushteve, qeveria pati përgjegjësi më të madhe se ajo në Shqipëri.
