Ish-kryetari i KQZ-së, Arben Ristani shprehet se Reformën Zgjedhore e shikon si një fasadë të kryeministrit Rama.
I ftuar në emisionin “Real Story” në News24, Ristani tha se kjo reformë nuk qëndron e vetme dhe se nuk ka kuptim pa pasur drejtësi të pavarur.
Sipas tij, fajtore kryesore lidhur me këtë çështje është vetëm qeveria.
“Reforma Zgjedhore është pikë kyçe për integrimin e Shqipërisë, por kjo reformë po vonohet. Ka papërgjegjshmëri për mënyrën si po trajtohet kjo reformë, ka mos-transparencë për publikun. Reforma Zgjedhore nuk ka kuptim pa pasur drejtësi të pavarur. Garanti i të Drejtave të Njeriut është Kushtetuesja, që nuk ekziston tani për tani. Kjo reformë është e lidhur me sistemin e adresave, me të gjithë të tjerat. Bëhet sikur janë të sinqertë, por në fakt shihen veç interesa momentale. Edhe rekomandimet e OSBE ODIHR-it janë që më 2013 e nuk kanë ecur sa duhet. Edi Rama bën fasada.
Nuk ka engjëj, por fajin gjithmonë e ka pushteti më shumë. Edhe kur PD ka qenë në pushtet, përgjegjësia shihej më shumë tek maxhoranca. Edhe futja e teknologjisë ndikon në shumë hallka të procesit, por do shumë kujdes. Teknologjia kërkon besim. Pra duhet besuar teknologjia që ta zbatosh më pas. Por unë besoj se teknologjia gjen hapësira, mund të gjejë sepse tashmë është përhapur thuajse kudo. Ka vende që bëjnë numërim teknologjik shumë shpejt. Më shumë ka mungesë të vullnetit politik, kjo është njësh. Ka mungesë të vullnetit politik sepse nuk ka burra shteti. Por faji më shumë gjithmonë i takon pushtetit”, tha ai.
