Partia Demokratike së bashku me aleatët e saj kanë pranuar ftesën e OSBE-së, për tryezën e thirrur nga kjo e fundit për reformën zgjedhore.
Bëhet me dije se opozita do të përfaqësohet në nivel ekspertësh në këtë tryezë.
Vendimi në fjalë vjen pas ultimatumit të SHBA, ku përmes të dërguarit të posaçëm të SHBA për Ballkanin Perëndimor, Mathew Palmer, i kërkuan opozitës joparlamentare që të ulet në dialog me qeverinë, për të miratuar reformën e re zgjedhore.
Tryeza e iniciuar nga OSBE është parashikuar të zhvillohet nesër në orën 09:00.
Kryetarja e LSI-së, Monika Kryemadhi, në një prononcim për median u shpreh se do të paraqesin mendimin e tyre.
“Opozita e bashkuar mori vendimin për të marrë pjesë në tryezën që organizohet në nivel teknik. Takimi ngarkoi z. Basha dhe disa të tjerë për të informuar ambasadorin lidhur me vendimin”.
Por a është hapi i parë për të zgjidhur krizën?
“Problemi nuk ka qenë opozita për zgjidhjen e krizës, por kryeministri me kupolën e tij kriminale. Opozita ka qenë gjithmonë e gatshme jo për të zgjidhur krizën personale as të Edi Ramës, askujt tjetër, por për të ecur përpara për të hapur me urgjencë integrimin e BE-së. Opozita po vazhdon punën me intensitet të plotë për paketën antikrizë, jo për krizën politike të Edi Ramës, por për tu dhënë shqiptarëve më shumë punë dhe garanci. Kriza nuk është vetëm parlamenti, por dhe situata në të cilën gjenden shqiptarët”.
