Komisioni i Reformës Zgjedhore u mblodh online pas disa javësh pushim prej koronavirusit. Bashkëkryetarët Gjiknuri dhe Hajdari informuan lidhur me ecurinë e komisionit. Në një prononcim për mediat, Damian Gjiknuri u shpreh se nuk i ka kuptuar deklaratat e opozitës, dhe si pasojë nuk e ka të qartë nëse bashkëpunimi do të vijojë apo jo.
Përfaqësuesi i PS bëri me dije se në rast se opozita nuk do të zgjedhë bashkëpunimin, reforma do të miratohet në Kuvend me votat e mazhorancës dhe të opozitës së re.
“Në qershor do t’u japim kohë Kuvendit për drafte. Disa përfaqësues të opozitës lëshuan disa informacione kontradiktore.
Vullneti ynë është i hapur dhe dora është e shtrirë. Por mospjesëmarrja e tyre, nuk mund të mbajë peng procesin.
Kam bërë kontaktet e mia informale. Nuk kam marrë një përgjigje. Disa deklarata të djeshme nuk i kuptova mirë.
Por është normale që të vazhdojmë aty ku e lamë. Në të kundër, Parlamenti i ka votat, ne i kemi votat edhe me opozitën parlamentare.
Por është e rëndësishme që të jemi të gjithë për ta miratuar. Nuk mund të kthehet në një çek pa skandencë.
Nëse ngelet problemi për një datë, edhe pse s’kam parë vullnet, do i drejtohem zyrtarisht PD, që jam gati për dialog. Unë do propozoj rifillimin në javën që vjen të Këshillit. Nëse nuk duan të marrin pjesë, le t’ua thonë shqiptarëve”, tha ai.
