Kreu i Shtetit, Ilir Meta, është pyetur nga gazetarët sot për recitimin që bëri së fundmi në Korçë, ndërsa në qytetin juglindor kishte nisur bora. Ai sqaroi se u frymëzua nga reshjet e dëborës që mungojnë në kryeqytet, por edhe nga artistët e Korçës si dhe historia e qytetit. Në të njëjtën kohë nënvizoi se vargjet patriotike që ai recitoi, mund të kenë shqetësuar ata që ai i quajti “çunat e shoqatës së “Ballkanit të Hapur”.
“Të shkosh në Korçë, të rrish me artistë të jashtëzakonshëm, të përjetosh momentin që kur ti shkon nis edhe dëbora që na mungon aq shumë.. Duheshin marrë masa të mos mbylleshin shkollat.
E kuptoj që çunat e shoqatës së Ballkanit të Hapur, janë të shqetësuar nga përmbajtja e vargjeve që recitova, që i dedikohen një akti patriotik si hapja e shkollës së parë shqipe në Korçë… Janë të lirë të vazhdojnë me poezi të “Ballkanit të Hapur”. Unë nuk jam kaq kozmopolit. Unë jam i angazhuar në dashurinë për atdheun.”
Presidenti Ilir Meta publikoi ditë më parë një video nga Korça, ku shfaqej duke recituar në mes të dëborës disa vargje nga poezia e Naim Frashërit, kushtuar hapjes së mësonjëtores shqipe në Korçë.
“Lumja ti moj Korç’ o lule!
Q’i le pas shoqet e tua
Si trimi në ball u sule,
Ta paçim për jetë hua”, reciton Meta.
Më herët, Kreu i Shtetit u shfaq duke kënduar pranë këngëtarit të njohur shkodran, Bujar Qamili.
