Pas kalimit të Cristiano Ronaldos në kampionatin italian, Serie A, interesi i futbollistëve të mëdhenj për të luajtur atje është rritur. “Bombën” e radhës e hedh agjenti i Gareth Bale, i cili paralajmëron një largim të mundshëm të yllit uellsian nga Bernabeu.
Jonathan Barnett, kur u pyet për transferimin e lojtarit të tij te Juventusi u shpreh: “Asgjë nuk është e pamundur”. Sulmuesi uellsian është kthyer në lider te Real Madrid që pas transferimit të Cristiano Ronaldos në Torino në verën e kaluar, por ai mund të ndjekë hapat e portugezit një ditë.
“Gareth është shumë i lumtur në Real Madrid, por nëse po flasim për të ardhmen atëherë asgjë nuk është e pamundur në merkaton e transferimeve”, tha Barnett në një intervistë për të përditshmen italiane “Tuttosport”.
“Ronaldo ishte një humbje e rëndësishme për Real Madridin. Gareth pëlqente të luante me Cristiano, por ai është i lumtur sepse është në një klub të madh.
Është e vërtetë që pas transferimit të CR7 në Itali, yjet e huaj kanë filluar të marrin në konsideratë Serie A”, përfundoi interivistën agjenti i Bale.
