Presidenti Italian, Sergio Mattarella i ka bërë thirrje udhëheqësve të Bashkimit Evropian, që të reagojnë në lidhje me situatën e krijuar nga koronavirusi para se të jetë shumë vonë.
“Evropa duhet të miratojë masa të reja për të përballuar kërcënimin e paraqitur nga koronavirus”, tha Mattarella, raporton Reuters.
Mesazhi i presidentit italian erdhi pasi drejtuesit e BE-së nuk kishin arritur të bien dakord, për një qasje të përbashkët, në lidhje me trajtimin e pasojave të përshkallëzimit ekonomik nga pandemia.
“Iniciativat e reja janë jetike për të kapërcyer mënyrat e vjetra të të menduarit, që tani nuk janë në kontakt me realitetin e kushteve dramatike me të cilat përballet kontinenti ynë. Shpresoj që të gjithë ta kuptojnë plotësisht seriozitetin e kërcënimit me të cilin përballet Evropa para se të jetë vonë”, tha Mattarella.
Mattarella vlerësoi Bankën Qendrore Evropiane dhe Komisionin Evropian për përgjigjen e tyre ndaj krizës, duke thënë se ata kishin marrë “vendime të rëndësishme dhe pozitive financiare dhe ekonomike”. Teksa shtoi se liderët e BE-së nuk kanë bërë të njëjtën gjë.
Fjalimi i shkurtër i presidentit doli viral në internet, jo për shkak të mesazhit kryesor, por sepse zyra e tij rastësisht transmetoi një provë.
Në një moment ai ndalet dhe dikush jashtë kamerës thotë që flokët e tij kanë një “tufë”. Mattarella përkuli kokën dhe i tha me një buzëqeshje të vogël “Ah Giovanni, unë nuk mund të shkoj te berberët”.
