Kreu i Grupit Parlamentar të PS, Taulant Balla, pas mbledhjes së Kryesisë u shpreh për mediat se kjo forcë politike është në formatim të vazhdueshëm. Sakaq, ai i ka mëshuar fort faktit se do të ashpërsohen mekanizmat në Partinë Socialiste ndaj atyre personave që nuk deklarojnë saktë të kaluarën e tyre, sipas ligjit të dekriminalizimit. Balla shtoi më tej se PS do të vazhdojë të jetë forca motor e reformimit të brendshëm dhe për vendin.
“Valdrin Pjetri për shkak të problemeve me drejtësinë në të kaluarën, dha dorëheqjen. Ai kishte kryer një vepër, që përfshihej në sferën e ndalimit të ushtrimit të funksionit publik.
Kryeministri ka shprehur edhe sot gatishmërinë që personat që nuk deklarojnë të kaluarën e vetë, të merren masa ndaj këtyre personave. Ligji i dekriminalizimit është ligj është i rëndësishëm. Përgjegjësia në këtë rast është personale.
Dekriminalizimi bëhet përmes mekanizmave. PS do të vazhdojë të jetë forca motor e reformimit të brendshëm dhe për vendin. Ne i kemi kërkuar popullit të Shkodrës falje, por përgjegjësia është personale. PS nuk ka bërë kurrë mburojë për askënd. Nëse PD ka ushqyer Xhelal Mziun në burg, ne kurrë nuk e kemi bërë këtë”, tha Balla.
Taulant Balla theksoi më tej se PS ka qenë dhe mbetet në proces të ndryshimit të vazhdueshëm. “Në shkurt do të jetë Kongresi, i cili do të zgjedhë Asamblenë dhe Kryesinë. Siç e dini, PS është e vetmja parti që është në proces të vazhdueshëm demokratizimi.
Ne morën vendim që në strukturën e Bashkisë Shkodër, të riformatojmë partinë. Kemi marrë vendim për të pasur vëmendje të veçantë. Do të jemi të gjithë të vëmendshëm për të ndjekur procesin e riformatimit të Bashkisë të Shkodrës. PS si partia më e madhe e shqiptarëve është në formatim të vazhdueshëm”, tha Balla.
