Nga qyteti i Vlorës, Basha u shpreh se vendi ndodhet në një emergjencë kombëtare, pasi shteti ka rënë. Këtë e lidh ngushtësisht edhe me disa raste pikante, ndërsa sjell në kujtesë rastin Shullazi.
https://tiranatoday.com/vendi-eshte-ne-nje-emergjence-kombetare-krimi-po-sundon-vloren/
Tashmë është kthyer në telenovelë dhënia e pretencës së prokurorisë për Emiliano Shullazin, dhe grupin e tij të bashkëpunëtorëve. Çështja ndaj “të fortit” më të lakuar të viteve të fundit s’po merr drejtim. Duke mbetur në të njëjtën linjë, kreu demokrat Basha tha se gjyqi ndaj tij është pa prokuror.
“Drejtësia e Ramës ka rënë, në gjyqin e Shullazit gjatë ditës së djeshme e gjithë trupa gjykuese ka refuzuar të marrë pjesë.
Sot gjyqi ndaj kryebanditit është pa prokuror. Nuk ka prokuror për të gjykuar banditët.
Drejtësia në kolaps, shteti në kolaps, pa gjykatë kushtetuese, pa prokurorë që të ndjekin çështjet e banditëve. Prokuroria ka rënë, siç e demonstron rasti i Shullazit”, u shpreh Basha.
Kjo çështje zvarritet prej muajsh, fillimisht për shkak të “tekave të avokatëve” dhe tashmë (si rrallë ndonjëherë), për shkak të vetë prokurorëve. Mesa duket, Prokuroria e Përgjithshme nuk po gjen dot një prokuror, që të lexojë pretencën për Emiljano Shullazin, dhe të akuzuarit e tjerë të të njëjtit proces.
