Organizata e Kombeve të Bashkuara ka nxjerrë një raport alarmues, që tregon se si njerëzit kanë një ndikim shkatërrues në natyrë, duke rrezikuar ekzistencën e shumë specieve.
Një milion specie bimore dhe shtazore kërcënohen tani me zhdukjen. Natyra kudo është në rënie, me një shpejtësi që nuk është parë më herët, ndërsa nevojat tona për më shumë ushqim e energji janë në rritje. Kjo tendencë, sipas studimit, mund të ndalet, por do të duhej një “ndryshim transformues” në çdo aspekt të asaj se si njerëzit ndërveprojnë me natyrën.
Nga bletët, tek pyjet, ky raport zbulon se si njerëzit po shkatërrojnë ekosistemet që mbështesin shoqëritë e tyre. Ky raport mbështetet në 15,000 referenca dhe është përpiluar nga Platforma Ndërqeveritare e Politikave Shkencore mbi Biodiversitetin dhe Shërbimet e Ekosistemit (IPBES) dhe shkon deri në 1,800 faqe.
Përmbledhja e publikuar sot (40 faqe), është ndoshta ‘padia’ më e fuqishme që dëshmon se si njerëzit e kanë trajtuar ‘shtëpinë’ e tyre të vetme.
Thuhet se ndërsa Toka gjithmonë ka vuajtur nga veprimet e njerëzve në histori, gjatë 50 viteve të fundit, këto ‘gërvishtje’ janë bërë plagë të thella. Popullsia e botës është dyfishuar që nga viti 1970, ekonomia globale është rritur katër herë, ndërsa tregtia ndërkombëtare është rritur 10 herë më shumë.
Pyjet janë shkatërruar në një ritëm të habitshëm, veçanërisht në zonat tropikale, duke u shfrytëzuar për të ushqyer, veshur apo për energji. Midis 1980 dhe 2000, humbën 100 milionë hektarë pyje tropikale, kryesisht në Amerikën e Jugut dhe plantacionet e vajit të palmës në Azinë Juglindore.
Qytetet tona janë zgjeruar me shpejtësi, me zonat urbane duke u dyfishuar që nga viti 1992. E gjithë kjo veprimtari njerëzore është duke vrarë speciet në numër më të madh se kurrë më parë. Sipas vlerësimit global, një mesatare prej rreth 25% e kafshëve dhe bimëve tashmë janë të kërcënuar.
Tendencat globale në popullsinë e insekteve nuk janë të njohura, por rëniet e shpejta në disa vende gjithashtu janë dokumentuar mirë.
E gjithë kjo sugjeron se rreth një milion specie tani përballen me zhdukjen brenda pak dekadave, një shkallë shkatërrimi dhjetëra qindra herë më e lartë se mesatarja gjatë 10 milion viteve të fundit.
Vlerësimi gjithashtu gjen se tokat po degradohen si kurrë më parë. Kjo ka zvogëluar produktivitetin e 23% të sipërfaqes së tokës të Tokës.
Oreksi ynë i pangopur po prodhon një mal me mbeturina. Ndotja e plastikës është rritur dhjetë herë që nga viti 1980. Çdo vit ne hedhim 300-400 milion ton metale të rënda, tretës, llum toksik dhe mbetje të tjera në ujërat e botës./ Burimi BBC, përshtati Tirana Today
