Deputeti i Partisë Socialiste, Alket Hyseni ka deklaruar se Komisioni Hetimor i ngritur nga Kuvendi për Metën do t’i çojë deri në fund hetimet, ndërsa shton se publiku pret që Presidenti të largohet vetë.
I ftuar në “RTV Ora”, Hyseni thekson se është Gjykata Kushtetuese si filtri fundor që do të vendosë nëse jemi në rrethanat e parashikuara nga dispozitat konkrete kushtetuese për shkarkimin e Presidentit të Republikës.
“Shkarkimi ose jo është një çështje procedurale tani. Ne do të mbarojmë hetimin në Komisionin Hetimor në kontekst të ekspertizës që bëjmë aty. Raporti do ti paraqitet seancës plenare. Është Kuvendi i Shqipërisë si institucion që do të marrë vendimin politik. Nëse Kuvendi do të marrë vendimin se janë rrethanat për shkarkim i kalon Gjykatës Kushtetuese.
“Sa i takon aspektit politik, pritshmëritë e gjithë publikut janë që presidenti i Republikës ti qëndrojë angazhimit të marrë publikisht për dorëheqje pasi Komisioni i Venecias në raportin paraprak e ka deklaruar shkeljen e Kushtetutës. Por le të presim raportin përfundimtar dhe ta bëjmë atë zyrtarisht publik dhe unë besoj se Presidenti do të gjejë kurajën që në nderim të institucionit dhe personit të tij të marrë vendimet e duhura duke lehtësuar edhe Gjykatën Kushtetutën nga një moment i tillë”, tha deputeti socialist.
