Presidenti Ilir Meta ka reaguar pas publikimit të raportit të Qendrës Evropianë të Drogave për situatën në Shqipëri.
Përmes një postimi në Facebook, Meta thotë se ky raport është një kambanë e fortë alarmi t’i bashkojë të gjitha forcat për të mos lejuar përsëritjen e këtij fenomeni.
Kreu i shtetit theksoi se lufta kundër kanabisit është një nga kushtet e përcaktuara për integrimin evropian. Sipas tij, çdo neglizhencë në këtë drejtim do kishte pasoja tepër të rënda për të ardhmen e vendit.
Postimi i plotë:
Përqendrimi i Policisë së Shtetit, Shërbimit Informativ Shtetëror, Prokurorisë dhe agjencive ligjzbatuese në luftën kundër kanabisit është i domosdoshëm.
Raporti vjetor i Qendrës Europiane të Drogave i publikuar së fundmi, është një këmbanë e fortë alarmi që duhet të zgjojë dhe t’i bashkojë të gjitha forcat e përpjekjet për të mos lejuar kurrë më përsëritjen e këtij fenomeni kanceroz për shoqërinë, që aq shumë e ka dëmtuar imazhin e Shqipërisë.
Lufta kundër kanabisit është kusht për integrimin europian dhe çdo neglizhencë në këtë drejtim do kishte pasoja tepër të rënda për të ardhmen e vendit. ????
