Komisioni Hetimor i ngarkuar nga mazhoranca për të hetuar Presidentin e Republikës Ilir Meta, pritet të dërgojë në Kuvend raportin me propozimin për shkarkimin e tij, të premten e 28 majit.
Sipas gazetarit Muhamed Veliu, votimi i këtij raporti në Kuvend do të bëhet me datë 10 qershor, dhe me shumë gjasa, edhe votimi për shkakrkimin e Kreut të Shtetit pritet të ndodhë në të njëjtën seancë.
Javën e ardhshme grupi parlamentar socialist pritet t’i kërkojë Konferencës së Kryetarëve futjen në rend dite për diskutim dhe votim të raportit te Komisionit Hetimor, po në datën 10 Qershor.
Ngritja e komisionit hetimor u votua me 97 vota pro dhe 6 kundër në Kuvendin e Shqipërisë, më 9 maj. 49 deputetë të mazhorancës iu drejtuan më herët Kuvendit me kërkesën për shkarkimin e Kreut të Shtetit.
Presidenti Meta u përfshi në një sërë replikash të ashpra dhe përplasje me Partinë Socialiste ku në fokus ishin zgjedhjet e 25 prillit. Presidenti u zotua se do të mundësonte votën e lirë të shqiptarëve që sipas tij, do t’i bashkoheshin në një referundum popullor.
Deklaratat e tij gjatë fushatës arritën majën e tensionit kur kreu i shtetit deklaroi se “do t’ju presim dorën atij që prek votën”, apo “bëni gati sfurqet dhe kosat”. Sipas mazhorancës, presidenti ka shkelur rëndë kushtetutën me deklaratat e tij, dhe duhet të shkarkohet.
