Policia ka shkuar sërish në vendngjarje, ku u ekzekutua Everest Çaka, duke iu rikthyer edhe një herë kontrolleve. Gjatë mesditës së sotme, oficerë të krimeve të rënda janë kthyer sërish në vendin ku u vra Everest Çaka në lagjen “Skenderbej” të qytetit të Elbasanit, duke vijuar kontrollet në disa banesa.
Everest Çaka, 41 vjeç, u vra me 11 maj në Elbasan pasi u qëllua me armë, teksa po udhëtonte me makinë së bashku me bashkëshorten Silvana Çaka. Kjo e fundit mbeti e plagosur lehtë në dorë.
Everest Çaka, njihej edhe me emrin Ibrahim Çaka. Çifti Çaka mësohet se jetonin në Spanjë dhe sapo ishin kthyer në Elbasan. Dyshohet se shkak për atentatin kanë qenë larja e hesapeve. Kjo pasi Ibrahim Çaka ka qenë i akuzuar për ekzekutimin e Gëzim Alikajt, ngjarje e ndodhur në vitin 2010. Saga e vrasjeve ka nisur rreth 13 vite më parë, pasi Everest Çakës i kanë vrarë një vëlla në Barcelonë, ndërsa si i përfshirë direkt u akuzua Gëzim Alikaj.