Instituti i Statistikave ka publikuar raportin “Anketa Tremujore e Forcave të Punës”. Sipas këtij raporti, punësimi ka shfaqur tendencë në rritje, por ajo që vihet re është shkalla e ulët e njerëzve të punësuar.
Kështu, në tremujorin e dytë të 2017, për popullsinë 15-64 vjeç, shkalla e punësimit është vetëm 57,3%. Gjithashtu, vihet re se numri i meshkujve të punësuar është shumë më i lartë se i femrave teksa shkalla e pjesëmarrjes në forcat e punës për femrat është 57,7 %, ndërsa për meshkujt ky tregues është 75,7 %. Për meshkujt, shkalla e pjesëmarrjes në forcat e punës është 18 pikë përqindje më e lartë sesa për femrat.
Ndërkohë, aktualisht shkalla zyrtare e papunësisë në Shqipëri është 13,9 %.
Më poshtë detajet mbi anketën tremujore të forcave të punës në vendin tonë:
Gjatë këtij tremujori, krahasuar me të njëjtin tremujor të vitit 2016, punësimi u rrit me 3,4 %.
-Në terma tremujorë, krahasuar me tremujorin e parë të vitit 2017, punësimi pësoi një rritje prej 1,8 %. –Në tremujorin e dytë 2017, shkalla zyrtare e papunësisë në Shqipëri, për popullsinë 15 vjeç e lart, është 13,9 %. Krahasuar me tremujorin e dytë të vitit 2016, shkalla zyrtare e papunësisë u ul me 1,6 pikë përqindje.
-Krahasuar me tremujorin e parë 2017, shkalla zyrtare e papunësisë pësoi një rënie prej 0,3 pikë përqindje. Në tremujorin e dytë të vitit 2017, shkalla e pjesëmarrjes në forcat e punës për popullsinë 15-64 vjeç është 66,8 %.
-Krahasuar me tremujorin e dytë të vitit 2016, shkalla e pjesëmarrjes në forcat e punës është rritur me 1 pikë përqindje. Krahasuar me tremujorin e mëparshëm ky tregues është rritur me 0,9 pikë përqindje.
Për femrat, shkalla e pjesëmarrjes në forcat e punës është 57,7 %, ndërsa për meshkujt ky tregues është 75,7 %. Për meshkujt, shkalla e pjesëmarrjes në forcat e punës është 18 pikë përqindje më e lartë sesa për femrat. Krahasuar me të njëjtin tremujor të vitit 2016, shkalla e pjesëmarrjes në forcat e punës për femrat ka rënë me 0,3 pikë përqindje, ndërsa për meshkujt është rritur me 2,2 pikë përqindje.
Gjatë tremujorit të dytë të vitit 2017, shkalla e pjesëmarrjes në forcat e punës për të rinjtë e moshës 15- 29 vjeç është 45,7 %. Për popullsinë 30-64 vjeç, në tremujorin e dytë 2017, shkalla e pjesëmarrjes në forcat e punës është 76,9 %.
Punësimi:
Shkalla e punësimit për meshkujt është 64,1 %, ndërsa për femrat 50,3 %. Krahasuar me të njëjtin tremujor të vitit 2016, shkalla e punësimit për meshkujt është rritur me 3 pikë përqindje, ndërsa për femrat rritja është me 0,7 pikë përqindje. Shkalla e punësimit të të rinjve është 33,6 %. Për popullsinë 30-64 vjeç, në tremujorin e dytë 2017, shkalla e punësimit është 68,6 %.
Ritmi vjetor i rritjes së punësimit për popullsinë 15 vjeç e lart, nga tremujori i dytë i vitit 2016 në tremujorin e dytë të vitit 2017, është 3,4 %. Në terma vjetorë, rritja e punësimit sipas sektorëve kryesorë të ekonomisë është: 9 % në sektorin e shërbimeve dhe 2,5 % në sektorin e industrisë. Në sektorin e bujqësisë pati një rënie të punësimit prej 1,7 %. Krahasuar me tremujorin e mëparshëm, në tremujorin e dytë 2017, punësimi për popullsinë 15 vjeç e lart pësoi një rritje të lehtë prej 1,8 %. Punësimi u rrit në sektorin e shërbimeve me 3,4 %, në sektorin e industrisë me 1,5 % dhe në aktivitetet bujqësore me 0,1 %.
Papunësia:
Në tremujorin e dytë 2017, shkalla zyrtare e papunësisë në Shqipëri është 13,9 %. Krahasuar me të njëjtin tremujor të vitit 2016, shkalla e papunësisë për meshkujt ka rënë me 1,5 pikë përqindje dhe për femrat ka rënë me 1,7 pikë përqindje. Shkalla zyrtare e papunësisë për meshkujt është 14,9 % dhe për femrat është 12,5 %.
Shkalla e papunësisë për femrat është 2,4 pikë përqindje më e ulët sesa për meshkujt. Shkalla zyrtare e papunësisë për të rinjtë është 26,4 %. Në terma vjetorë shkalla e papunësisë së të rinjve shfaq tendencë në rënie.
Krahasuar me tremujorin e dytë të vitit 2016, shkalla e papunësisë për të rinjtë në tremujorin e dytë të vitit 2017 është 3,5 pikë përqindje më e ulët.
Krahasuar me tremujorin e parë 2017, shkalla e papunësisë për të rinjtë ka pësuar një rënie prej 0,2 pikë përqindje. Shkalla e papunësisë për grup-moshën 30-64 vjeç është 10,8 %. Në terma vjetorë ky tregues pësoi një rënie prej 1,1 pikë përqindje.
Krahasuar me tremujorin e mëparshëm për këtë grup-moshë shkalla e papunësisë ka rënë me 0,4 pikë përqindje.
Popullsia ekonomikisht jo-aktive
Gjatë tremujorit të dytë të vitit 2017, 20,6 % e popullsisë ekonomikisht jo-aktive dhe në moshë pune (15-64 vjeç) ishin duke përmbushur detyrat shtëpiake, 11,6 % e saj ishte në pension ose pension të parakohshëm, ndërsa 9,1 % në paaftësi të përhershme. Gjatë tremujorit të dytë 2017, 6,3 % e popullsisë ekonomikisht jo-aktive (në grup-moshën 15-64 vjeç) deklaruan se nuk po kërkonin punë pasi besonin se nuk ka punë të disponueshme.
Të rinjtë e moshës 15-29 vjeç, që deklaruan se janë nxënës/studentë ose në trajnim, përbëjnë 73,2 % të të rinjve ekonomikisht jo-aktivë. Ndër të rinjtë e moshës 15-29 vjeç ekonomikisht jo-aktivë, 3,3 % klasifikohen si të papunë të dekurajuar. Në popullsinë e moshës 30-64 vjeç ky grup përbën 9,7 % të popullsisë ekonomikisht jo-aktive të kësaj grup-moshe.
