Kreu i Shtetit, Ilir Meta, paralajmëroi dje se hapi i tij i parë pas përfundimit të mandatit presidencial në 24 korrik do të jetë krijimi i një lëvizje të re politike. Në një intervistë televizive për “Syri.TV”, Meta tha se sovraniteti i vendit tonë është baltosur. Ai premtoi se në plan të parë kur të rikthehet në politikë do të vendosë sovranitetin e Shqipërisë. Presidenti Ilir Meta tha në emisionin “Çim Peka Live” se sovraniteti i vendit do të jetë një nga çështjet që do angazhohet fort.
“Kthimi i sovranitetit të popullit shqiptar, do jetë një nga çëshjet që do angazhohem në të ardhmen”, tha Meta. Ai pohoi se do të qëndrojë gjatë në politikë, ndërsa shtoi se sovraniteti do të jetë një nga çështjet që do te jetë pjesë e ridimensionimit të opozitës pas 24 korrikut.
“Është dëmtuar sovraniteti i vendit dhe i popullit shqiptar, që është zot i vendit të vet. Sovraniteti do të jetë tema kryesore, por gjithashtu do te jem i angazhuar për demokracinë, lirinë, ekonominë dhe të drejtave të qytetarëve. Kjo do jetë edhe një nga çështjet që do te jetë pjesë e ridimensionimit të opozitës pas 24 korrikut”.
Ndër të tjera, Meta pohoi se s’do pranojë asnjë propozim për një mandat të dytë si President. “Pas 25 vitesh ndoshta”, tha Meta.
Presidenti: Basha kec, kam qenë i tradhtuar në çdo drejtim
Meta iu kthye akuzave se mazhoranca dhe opozita minuan demokracinë nëpërmjet bashkëpunimit që prej vitit 2019, kur u dogjën mandatet parlamentare nga opozita dhe kjo e fundit bojkotoi zgjedhjet lokale. Meta sulmoi ish-kreun e opozitës Lulzim Basha duke e quajtur “kec” për sjelljet politike në 2019. Ai deklaroi se opozita shqiptare është shitur dhe e kapur nga kryeministri Edi Rama.
“Me Bashën i kam pasur gjërat e qarta para 25 prillit. Ia kam thënë dhe Berishës dhe Kryemadhit. Kam qenë i tradhtuar dhe i provokuar nga të gjitha drejtimet. Opozita ka qenë e kapur dhe e shitur. Ndaj ndodhi ajo që ndodhi më 25 prill. Madje e kam paralajmëruar më herët djegien e mandateve që në 2018. Kam pasur më pak kompetenca. Djegia e mandateve ka qenë e koordinuar mes Ramës dhe Bashës. U duhej djegia e mandateve që të mos futeshin në zgjedhje. Kur më thanë që do digjnin mandatet, u thashë: “Po Rama pikërisht këtë do. Pse me këtë kecin (Bashën) ju do e përmbysni Ramën?!”.
