Kryeministri Edi Rama ka dalë në një tjetër komunikim live, për të folur në lidhje me masat shtrënguese të ndërmarra për shkak të koronavirusit.
Kreu i qeverisë zbardhi edhe bisedën telefonike që ka zhvilluar më herët sot me kryeministrin grek, Kyriakos Mitsotakis.
Rama tha se kanë diskutuar mbi rezultatet e deritanishme, strategjinë e testimit dhe lehtësimin e masave. Gjithashtu ai thekson se kanë folur edhe në lidhje me planin e hapjes së sezonit dhe interesin reciprok për punësimin sezonal.
Kryeministri tha se ka falenderuar Mitsotakis për shqiptarët e mbetur në Greqi, të cilët sipas tij, “nuk u trajtuan si shkelës të afateve”.
“Sot patëm një diskutim mbi strategjinë e fazës së dytë. Më parë u informoj se pas konsultimeve me miq dhe kolegë kam pasur një bashkëbisedim me kryeministrin grek për fazën e dytë. Diskutuam mbi rezultatet e deritanishme, strategjinë e testimit, lehtësimin e masave, planin e hapjes së sezonit dhe interesin reciprok për punësimin sezonal.
E falenderova me gjithë zemër mikun grek për ata punonjës sezonal që mbetën matanë kufirit, por nuk u trajtuan si shkelës të afateve. Dakordësuam që të shohim problemin e lëvizjes së punonjësve sezonale sipas kalendarit të fazës së dytë dhe për nevojën reciproke që ti çelet rrugë rreth mesit të muajit maj”, tha ai.
