Kryeministri Edi Rama a shpalosur sot planin për lehtësimin e masave të ndërmarra për frenimin e përhapjes së koronavirusit në Shqipëri.
Në një komunikim live në Facebook, Rama tha se vendi do të hapet me kujdes dhe jo në të gjitha qytetet njëlloj.
Ai tha se në ato qytete ku risku është më i ulët, lehtësimet do të jenë më të mëdha. Kreu i qeverisë theksoi se për momentin në Krujë, e cila është vatra më e re e koronavirusit nuk do të ketë lehtësim të masave.
Ndërsa për Tiranën dhe Durrësin, ku janë verifikuar edhe rastet më të shumta do të ketë një lehtësim të moderuar. Sipas tij, edhe fashat orare nuk kanë pse të jenë të njëjta si në vendet me risk të ulët ashtu edhe në ato me risk të lartë.
“Do të përdorim një taktikë, do të hapemi me kujdes, por jo kudo njëlloj. Po ta shohim sot bilancin e Shqipërisë në hartën e Ballkanit apo Evropës, jemi në grupin e vendeve më të suksesshme, në dy parametrat kryesorë, te numri i të vdekurve në një milion banorë dhe numri i pacientëve në terapi në raport me të infektuarit. Masat kanë dhënë efekt, por falë qytetarëve, që në 99% keni qenë engjëjt mbrojtës të familjeve. Po të shohim hartën, vala e goditjes nuk ka qenë kudo e njëjtë, që do të thotë se po të hapemi kudo njëlloj rrezikojmë ta zgjerojmë fushën e armikut dhe rrezikojmë kthimin e të gjithëve mbrapa. Për shembull në Gjirokastër apo Dibër ku risku është shumë i ulët mund të kemi më shumë lehtësim masash, por në Krujë asnjë lehtësim, apo në Tiranë dhe Durrës një lehtësim të moderuar. Këto mund të variojnë në varësi të dinamikës së luftës dhe sjelljes së qytetarëve. Kjo qasje do të lehtësojnë shumë në zona të ndryshme lëvizjen me këmbë apo me makinë. Brenda disa bashkive mund të lehtësojmë shumë lëvizjen. Për shembull për njerëzit e fshatit për të shkuar në qytet, apo një familje që të rrijë e gjithë brenda. Edhe fshat orare nuk kanë pse të jenë njëlloj si në zonat me risk të ulët dhe te ato me risk të lartë. Masat e shtrënguara në një zonë me rrezik të lartë, mund ta kthejnë me rrezik të ulët si zonë. Javën e ardhme në bazë së hartës së epidemisë do të pilotojmë në disa zona me risk të ulët një lehtësim të masave”, tha ai.
