Dy ditë më parë, kryeministri Rama provokoi BE me idenë e bashkimit mes Shqipërisë dhe Kosovës. Ai avancoi edhe një hap duke folur për hartimin e një strategjie të përbashkët mes Prishtinës dhe Tiranës.
Gjatë fjalës së tij në mbledhjen mes dy qeverive në Pejë, Rama i bëri ftesë Haradinajt që të nisë puna nga dy Ministritë e Jashtme, për hartimin e një strategjie të përbashkët, për bashkimin e shqiptarëve. Rama shtoi se Shqipëria nuk mund të presë pafundësisht BE-në në lidhje me pranimin në këtë organizëm, sikurse Kosova është e lodhur nga pritja për liberalizimin e vizave.
Kjo deklaratë mori vëmendjen e mediave në Kosovë, Serbi e më gjerë. Kaq ka mjaftuar që karikaturistët kosovarë, menjëherë të viheshin në lëvizje dhe të nxirnin “veprën” e tyre të radhës. Pas fjalimit të tij në mbledhjen e dy qeverive në Pejë, artistët kanë publikuar “Ramën xhongler” me Shqipërinë, Kosovën dhe BE-në.
