Kryeministri Edi Rama ka vizituar ditën e sotme familjen Gjini në Laç, e cila është akomoduar në një apartament me qira që pas tërmetit të 26 nëntorit. Sipas kryebashkiakes së Kurbinit, familja e Eduardit i cili është trajner i U19 në Laç ka qenë e para që ka përfituar nga bonusi i qerasë.
“Aktualisht jam trajner i U19 në Laç. Edhe goca më tha dje babi kur të vijë kryeministri e kam një të përbashkët me të, ai është piktor dhe unë kam qejf të bëhem piktore”, tha Eduardi.
Kryebashkiakja ndau me kryeministrin një tjetër fenomen që po shoqëron banorët e Laçit. Sipas saj, që pas tërmetit të 26 nëntorit banorët kanë vendosur të transferohen në shtëpi përdhese private.
Nga ana tjetër Rama thekson se synon ta kthejë Laçin në një qytet mikpritës për turistët, të cilët sipas tij janë të shumtë pasi vijnë dhe vizitojnë kishën e Shna Ndout.
“Ne sot erdhëm bashkë me ministrin e urbanizimit të Turqisë, ata do bëjnë një pjesë, 500 apartamente se është më shumë se aq, të parat që do ndërtohen janë pallatet që u prishën, ambicia është për ti bërë sa më shpejt, të përfundojmë sa më shpejt dokumentacionin, planin, besoj që deri nga fundi i verës, fillimi i vjeshtës shtatori do hyni në shtëpi.
Do jenë më të mira se ato që ishin do bëhet lagje shumë e bukur, edhe te pjesa e konvikteve nuk mbajnë më e duhet ti pastrojmë. Një projekt do gjashtë muaj të paktën, po bëjmë çmos ta përshpejtojmë kohën, të zgjidhim edhe këtë problemin e tmerrshëm të Laçit me përroin që përmbyt dynjanë.
Tërmetin nuk e deshëm por duhet ta shfrytëzojmë për të dalë më të fortë e më mirë
plus që këtu me kishën e Shna Ndout ju keni 3 milionë njerëz në vit, deri më sot s’kanë qëndruar në Laç se s’ka ku të rrish, ndërkohë do jetë edhe një profil qyteti më shumë turistik që të vijnë njerëzit të rrinë pak më shumë. Kjo është një ndeshje që ne do e fitojmë këtë herë”, tha kreu i qeverisë.
